Në afërsi të fshatit Polizhan të komunës Poshnje, për shkak të rrugës gruaja është ndjerë keq dhe ka zbritur nga makina. Për t’i ardhur në ndihmë, 54-vjeçari i ka hedhur ujë gruas dhe ka nisur t’i bëjë masazh në pjesën e qafës. Gjesti ka acaruar së tepërmi bashkëshortin e saj, i cili ka filluar të debatojë me shoferin dhe më pas e ka qëlluar me thikë në krah dhe shpatull. Më pas dy bashkëshortët janë larguar në brendësi të fshatit, ndërsa banorët kanë lajmëruar policinë, e cila ka shpallur në kërkim autorët.
NGJARJA
Refit Shalsi, i punësuar pranë një firme private karburantesh, ishte nisur të hënën nga Vlora në drejtim të Urës-Vajgurore në Berat. Ndërsa ka qenë duke kaluar në rrugën nacionale, në fshatin Levan të Fierit, një burrë i shoqëruar nga gruaja e tij i ka kërkuar t’i merrte deri në Berat si pasagjerë, ku kishin destinacionin e tyre. 54-vjeçari i ka hipur në autobotin e tij me targa AA 723 EC dhe kanë vazhduar rrugën në drejtim të Beratit. Pikërisht në fshatin Polizhan të komunës Poshnje, gruaja nuk është ndjerë mirë dhe ka zbritur nga mjeti. 54-vjeçari i ka hedhur ujë dhe ka nisur t’i bëjë masazh gruas, por ky gjest ka ngjallur nervozizëm tek bashkëshorti i saj, i cili është konfliktuar me shoferin. Sherri ka degjeneruar në dhunë fizike dhe burri që ishte pasagjer në autobot e ka goditur me thikë në shpatull e krah drejtuesin e mjetit. Më pas burrë e grua i kanë marrë 54-vjeçarit edhe telefonin e tij celular tip Nokia, me qëllim që ai të mos kishte mundësi të njoftonte policinë. I gjakosur e i plagosur, shoferi ka tërhequr vëmendjen e banorëve, të cilët kanë lajmëruar policinë. Pasi ka kryer të gjitha veprimet hetimore në vendin e ngjarjes, policia ka nisur procedimin penal për veprat penale “Plagosje e lehtë me dashje” dhe “Vjedhje”, ndërsa po punon për kapjen e dy bashkëshortëve.